უკრაინაში ქართული ლეგიონი ბრიტანეთმა გაწვრთნა

რუსეთის საგარეო საქმეთა სამინისტროს განცხადებით, უკრაინაში მებრძოლი ქართული ლეგიონი დიდმა ბრიტანეთმა გაწვრთნა. ამის შესახებ РИА Новости უწყების პრეს-სპიკერ მარია ზახაროვაზე დაყრდნობით წერს.

“ღია წყაროებიდან ცნობილი გახდა, რომ ბრიტანელი სამხედრო სპეციალისტები წვრთნიდნენ ქართულ ლეგიონსაც – ასე ჰქვია უკრაინის შეიარაღებული ძალების ბატალიონს, რომელიც ძირითადად, იმ ეთნიკური ქართველებისგან შედგება, რომლებიც უკრაინის მოქალაქეები არ არიან”, – “რია ნოვისტის” ცნობით, ამბობს ზახაროვა.

ამავე ინფორმაციაში აღნიშნულია, რომ ბრიტანელი ინსტრუქტორები უკრაინაში მინიმუმ 12 თებერვლამდე იმყოფებოდნენ.

უკრაინაში „ქართული ლეგიონის“ რვა მებრძოლი დაშავდა. ინფორმაციას ამის შესახებ უკრაინაში საქართველოს საელჩოს ყოფილი პრეს-ატაშე ბაჩო ქორჩილავა სოციალურ ქსელ „ფეისბუკში“ ავრცელებს.

აღნიშნულ ცნობას სოციალურ ქსელშივე ადასტურებს სამხედრო ფორმირების მეთაური მამუკა მამულაშვილი.

„სამწუხაროდ, დღეს რვა ბიჭი გვყავს დაჭრილი“, – წერს „ქართული ლეგიონის“ ხელმძღვანელი.

გავრცელებული ინფორმაციით, „ქართული ლეგიონის“ წევრები დონეცკის ოლქის ტერიტორიაზე საარტილერიო ცეცხლში მოყვნენ.

უკრაინის თავდაცვის სამინისტროს ინფორმაციით, ბოლო დღე-ღამის განმავლობაში სპერატისტთა ძალებმა უკრაინის შეიარაღებული ძალების პოზიციებს 14-ჯერ გაუხსნეს ცეცხლი, რის შედეგადაც სამი უკრაინელი სამხედრო დაიღუპა.